VIGAN CITY – Awan iti ginnayyeman wennu awan iti maisiyasi nu ti maipatpatungpal nga ordinansa ditoy probinsiya iti mapagpapatangan, dayta iti bugas iti panagsarita ni Gov. Ryan Luis Singson inaig iti nainget a pannakaipatungpal iti ban kadagiti baboy ken pork products a maiserrek ditoy probinsiya.
Kayat ni Singson nga awan ti makalibas kadagiti quarantine checkpoint tapnu saan a makastrek ti African Swine Fever virus isu a malaksid iti panagridam dagiti miyembro ti quarantine office ken dagiti otoridad, kidkiddawen na iti pannakitinnulong dagiti umili tapnu makemmeg ken malapdan a makastrek ditoy probinsiya dagiti sukir nga agiserserrek kadagiti baboy ken frozen meat products babaen kadagiti naduma-duma a wagas kas iti panagaramat da ti private a lugan a pangiluganan kadagiti nasao a kontrabando.
Innayon na a kapatang nanto dagiti miyembro ti Ilocos Sur Hog Raisers Association para kadagiti sabali pay a gunguna a maipaay kadagiti siasino man a saan nga agbuteng nga agipulong kadakuada no adda dagiti maduktalanda nga agipaspastrek kadagiti kontrabando ditoy probinsia.
Immun-unan nga inwaragawag ti Ilocos Sur Hog Raisers Association a mangted da ti sangapulo ribo a pisos kadagiti tattao nga agipulong kadakuada nu siasino dagiti agiserserrek iti baboy ken naduma-duma a produkto ditoy probinsiya.
