Agtaltalinaed iti ospital ti lalaki a nagmaneho iti elf truck kalpasan a natukbob ti maysa a closed van itay parbangon idiay Barangay Ampandula, Santa, Ilocos Sur.
Iti pannaki-uman ti Bombo Radyo Vigan ken ni PCpt. Rovic Nelmida nga Acting Chief of Police iti Santa Municipal Police Station, agpapaamianan a direksyon dagiti dua a lugan a ti akin-sango ket ti elf idinto a sumarsaruno iti closed van.
Segun ken ni Nelmida, nabuntog iti panagpataray ti elf truck idin kellaat a tinukbob ti napaspas iti patarayna a closed van ket gapu ti impact, naideretso ti elf truck iti sangwanan a paset ti backhoe nga adda iti igid iti kalsada a gappuanan iti panagbaliktad ti elf truck.
Nadunor ti driver ti elf truck ken agalenna iti nasakit a tiyanna isu a manamnama a ma-xray ken maobserbaran iti kasasaadna.
No pay kasta ket awan iti sabali a nadangran iti nasao nga aksidente.
Pinasingkedan ni Nelmida a blind spot iti nasao a lugar ken accident prone area isu a pagan-annadenna dagiti agmanmaneho a motorista.
