VIGAN CITY – Mapapati a ti naglutwan a dalikan ti nakauraman ti maysa a pagtaengan idiay Barangay Pudoc East, Tagudin, Ilocos Sur a kukua ni Nolly Macabitas Barnachea, agtawen iti limapulo ket pito, maysa a mannalon.
Iti pannaki-uman ti asawa ni Nolly a ni Marites Barnachea, nairana nga awan ti tao iti pagtaenganda idi mauram ta napan nagburas iti kalamansi ti asawana idinto nga isuna ket napan nagtrabaho ket posible a nabaybay-an nga agbigbiggang ti naglutwanda.
Ti anakda a balasang ti nabati ngem pimmanaw met laeng iti pagtaenganda.
Nadamag laengen ni Marites ti balayda a maur-uram iti social media ket idi makasangpet, lumdaang ti riknana agsipud ta dimmapo amin dagiti alikamenda ket awan ti uray maysa a naisalbarda.
Naaramid laeng manipud iti light materials ti pagtaengan isu a nadaras a nagkayamkam ti apuy.
Kiddawna met kadagiti naayat ti panagpuspusona a tulongan ida kangrunaan ti pannakaipaay kadakuada iti taraon.
Kabayatanna, nagtitinnulongan met da Barangay Kagawad Melbert Manzo ti nangdepdep bayat a mayur-uray dagiti bumbero nga agresponde.
