Nadunor dagiti nagkalugan iti motorsiklo kalpasan a nakadinnungparda iti maysa nga SUV iti national highway idiay Barangay San Pablo, Sto. Domingo, Ilocos Sur iti ala una y media iti malem idi kalman, May 18, 2025.
Ti nagmaneho ti Mitsubishi Xpander ket ni Salome Dela Cruz Ubarre, agtawen iti limapulo ket maysa, naasawaan, mangisursuro, addaan ti driver’s license nga agnaed idiay Barangay Nanerman, Sto. Domingo.
Ti nagmaneho met iti Yamaha Aerox motorcycle ket ni Analyn Villamar Utreta, agtawen iti uppat a pulo ket dua, naasawaan, awanan ti trabaho, awan ti naipresentarna a driver’s license idinto a ti back rider-na ket ni Nena Agnes Villamar Verida, agtawen iti uppat a pulo, naasawaan, naasawaan, awanan ti trabaho nga agnaed idiay Patong, Magsingal.
Sakbay ti insidente ket nagsardeng ti SUV iti daya a paset ti kalsada a nakasango iti amianan idinto nga agpaammianan dagiti nagkalugan iti motorsiklo.
Idi nadanonda iti nasao a lugar ket nagsikko ti SUV iti kannigid ngem isun ti pannakapasamak iti aksidente.
Gapu ti pannakatumba dagiti nagkalugan ti motorsiklo ket nagsagaba ti driver ken back rider iti dunor iti nadumaduma a paset ti bagida isu a naipanda iti Magsingal District Hospital babaen ti Bureau of Fire Protection (BFP) personnel idinto a saan a naan-ano ti driver ken naglugan iti SUV.
