Nagturong iti Korte Suprema iti sumagmamano a grupo dagiti abogado tapno kiddawen ti temporaryo a panagsardeng ti impeachment trial kontra ken ni Vice President Sara Duterte.
Iti panangidaulo ni Atty. Israelito Torreon ken dagiti kakaduana nga abogado, impilada ti “Very Urgent Manifestation with Motion” iti korte Suprema.
Gagem ti nasao a mosyon a mangiruar ti korte ti Status Quo Ante Order tapno lapdan ti impeachment court, dagiti opisyal, mangibagi ken amin a kameng a mangitultuloy iti trial, panagawat ti ebidensia wenno proseso iti impeachment.
Kayat ngamin dagiti petitioner a malawagan pay ti immuna a petisyon a mangkukwestyon iti legalidad ti napasamak a sesyon idi June 3, 2026 a nangpabaliw iti liderato iti Senado.
Kiddaw pay ti grupo iti Korte Suprema a mangiruarda iti mayannatup a bilin a mangibagbaga a rumbeng laeng nga agtuloy ti impeachment trial no ti Rules of Procedures ket masursurot ken tiotoridad ti presiding officer ket saan a sumangsango iti unresolved constitutional challenge.
Kabayatanna, inlawlawagda a ti mosyon ket saan a maipanggep ti pulitika nu diketdi panagbalin a valid ken mayannatup ti linteg iti trial wenno panagdenggeg ti impeachment kontra ken ni Vice President Sara Duterte.
