Nakasaganan ti Metro Vigan Water District para iti umadani a tinawen a selebrasyon ti World Water Day inton March 22, 2025.
Iti pannaki-uman ti Bombo Radyo Vigan ken ni General Manager Ruby Barba, adda ti environmental awareness campaign nga aramidenda inton bigat ket ti Nansuagao Elementary School iti ili ti Caoayan ti napilida a pangisayangkatan.
Babaen iti nasao nga awareness campaign ket maisuro kadagiti agad-adal ti wagas a mabalinda nga aramiden tapno maliklikan ti epekto ti climate change, ken no kasano ti agtiped iti danum.
Ipagpaganetgetda met kadagiti water concessionaire nga uray napigsa ti supply uray tiempo ti kalgaw ket masapul latta a tipden ken numan adda dagiti agleak kadagiti gripo ti danumda ket ipakaammoda a dagus kadakuada wenno mangayabda iti tubero a mangtarimaan.
Malaksid dayta, agiwarasda pay iti flyers a nakailanadan dagiti wagas no kasano ti mangtiped iti danum.
