Inallukoy ti political analyst a ni Atty. Michael Henry Yusingco ni Vice President Sara Duterte a respetaren ti imbitasyon kenkuana a dumar-ay iti maikatlo a State of the Nation Address ni Presidente Ferdinand Marcos Jr inton July 22, 2024.
Kasaruno dayta ti panangiwaragawag ti bise presidente a saan a dumar-ay iti SONA ta imbilangnan ti bagina a “designated survivor”.
Iti pannaki-uman ti Bombo Radyo Vigan ken ni Yusingco, awan pay ti kasta a mekanismo ti pagilian ta no ibasar iti 1987 Constitution, rules of succession laeng ti masursurot ta masapul pay ti mekanismo sakbay a nga adda ti designated survivor.
Para ken ni Yusingco, saan a napintas para iti maysa a nakatugaw iti maikadua a kangatuan a posisyon ti gobierno ti addang ni VP Sara ta uray pay saan nga obligasyon ti maysa a bise presidente ti dumar-ay iti SONA ket nasken nga idayaw ti pannakaimbitarna ket dar-ayanna ti okasyon.
Innayonna a “deserve” met a maamuan ti publiko no apay a saanna a dar-ayan ti SONA, saan ket nga iti wagasna nga agang-angaw.
