Dakkel ti pammati ti maysa a nagturpos iti College of Law iti University of Northern Philippines a makapasa iti 2025 Bar Examination a nairuar idi kalman.
Iti pannaki-uman ti Bombo Radyo Vigan ken ni Atty. Moises Respicio Embat, umuna nga aldawna pay laeng a nag-exam ket naiteden ti kiniddawna a sign iti Namarsua a makakita iti numero 13 ket nairana nga isu pay iti seat number-na isu a natalek a maipasana iti bar exam.
Segun ken ni Atty. Embat, nalag-an pay iti riknana kalpasan ti exam a mangipasimudaag kenkuana a kabaelanna nga ipasa, banag nga isu iti napasamak.
Imbingayna a saan a nalaka iti panagadalna iti law school agingga idi nag-review para iti exam ta narigatan iti schedule-na, ta mangisursuro isuna iti agmalem ken agadal met iti malem agingga rabii, isu nga arigna bassit laeng iti orasna nga ag-review ket dandani pay simmuko iti panagbasana iti law.
Ngem impaganetgetna a saan a rason iti kina-busy nga schedule no kayat nga artapen ti arapaap ta no isu iti kalikagum ket maikkan dayta iti gundaway tapno maubra ken magun-od.
Imbingayna a ti kalikagumna a talaga ket agnegosyo ta isu ti indakkelanna a trabaho ti nagannakna ngem gapu ti panangallukoy kenkuana ti inana isu metten iti sinurotna.
Inaminna nga arapaap ti inana nga agbalin nga abogado ngem saan a napasamak isu nga idi inallukoyna isuna ti inana nga ag-law school ket inanamunganna nga isu metten ti nagrugian ti arapaapna nga agbalin met laeng nga abogado, nga itan ket nagun-odna isu nga isagutna daytoy iti nagannakna nangruna iti inana.
iti baet nga adda sinurot ni Atty. Embat a pammati idi nag-exam ket aminado a ti napalaus a panag-review na iti talaga a rason iti pannakapasana ta manipod pay idi agbasbasa ket talaga a pokus iti panag-review na.
Nagyaman pay isuna kadagiti amin a timmulong nangruna ti pamiliana tapno magun-od iti arapaapna nga agbalin nga abogado.
