VIGAN CITY – Simmuko kadagiti pannakabagi ti linteg ti maysa a security guard a nagpaputok iti paltog a nakatamaan ti maysa a baro idiay Barangay Ayudante, Candon City, Ilocos Sur.
Nabigbig ti suspek a ni George German Visico Cuenta, agtawen iti tallopulo ket lima, security guard, taga-Barangay Sabuanan, Sta. Lucia.
Ti biktima ket ni Juhandro Estacio Cagayoran, agtawen iti duapulo, carwash boy, taga-Barangay Cabaroan, Sto. Tomas, La Union ken aggigyan idiay Barangay Ayudante, Candon City.
Idi ala una y media itay parbangon (June 29), inreport ni Carole Galapo Galdones, konsehal ti Barangay Ayudante, Candon City iti kapulisan nga adda ti mapapati a biktima iti pammaltog a naitaray iti ospital.
Dagus a tinurong dagiti pannakabagi ti linteg ti ospital ket nabigbigda ti biktima.
Dagiti kadua ti biktima a dua a menor de edad ti nangitudo iti gwardya iti maysa a fastfood chain ti nagpaputok iti paltog kadakuada.
Maibasar iti imbestigasyon, alas nuebe singkwenta iti rabii ti June 28, nakaduty ti suspek iti pagub-ubraanna a fastfood chain idi nadlawna dagiti tallo a lallaki iti parking space ti motorsiklo a ti maysa kadakuada ket immasideg kadagiti motorsiklo ket ginuyodna ti hose manipud iti tangke ti motorsiklo ket kinargaanna ti 1.5 liter a botelya ti softdrinks isu a napanna sinangat ida ken nagpapaputok iti naminsan iti daya a direksyon.
Gapu dayta, timmaray dagiti tallo a lallaki nga awan ti pagaammona a napuntaanna ti maysa kadakuada.
Imet ti suspek ti paltogna nga Armscor 9mm a nairehistro iti Librians Security Agency iti isusukona kadagiti pannakabagi ti linteg.
