Indauluan ni Pres. Ferdinand Marcos Jr. ti mass oath-taking dagiti kabarbaro a na-promote a mangisursuro ken school heads manipod Bulacan ken Pampanga cluster iti salinong ti Expanded Career Progression (ECP) system – ti maikatlo a seremonya manipod nairusat iti programa.
Ti seremonya ket kasaruno dagiti immunan nga oath-taking idiay Ilocos Norte ken National Capital Region kas agtultuloy a panangbigbig ti administrasyon kadagiti mangisursuro a na-promote iti salinong ti ECP framework.
Segun ti presidente, personalna a dinar-ayan ti seremonya tapno ipaganetget ti kinapateg ti balligi para kadagiti mangisursuro a nabayagen nga agur-uray iti gundaway a pannakai-promote iti karerada.
Binigbigna pay iti sakripisyo dagiti mangisursuro nangruna iti panagriingda a masapa, panagbiahe a napaut, panag-check kadagiti papel ken panangisaganada iti leksyon karamanen ti akemda iti eleksyon, sensus ken serbisyo iti komunidad.
Impaganetgetna nga agtlinaed nga ipangruna ti administrasyonna ti edukasyon ken imbutaktakna a nasurok P1.34 trillion ti nailatang iti sektor ita a tawen a katukad iti nasurok uppat a porsiento iti national economy.
