Impresentar ti House prosecution panel iti panagdenggeg iti misuse of confidential funds ni Vice President Sara Duterte ti maysa nga acknowledgment receipt manipod Office of the Vice President (OVP) nga impasa iti Commission on Audit (COA).
Nakalanad dayta a ti kontrobersial a nagan a “Mary Grace Piatos” ket immawat ti P70,000 kas “payment of reward (medicines)”.
Segun ti testigo ti prosecution a ni Roderick Wamil, dati nga state auditor ti COA Intelligence and Confidential Funds Audit Office wenno ICFAO, ti acknowledgment receipt ket saan nga umdas ken kurang kadagiti supporting documents.
Impaganetgetna a ti nasao a resibo ket posible nga adda panaglabsing iti Joint Circular 2015-01 ta awan ti nayonna a dokumento a mangpaneknek ti balligi wenno documents evidencing success iti operasyon wenno transaksion a mangpainget iti rekisito no mangir-iruar ti payment of rewards babaen ti confidential funds.
Sinaludsod pay ni House prosecution counsel Atty. Lorna Kapunan ti testigo no ti naibayad a reward ket agas.
Kinuna ti testigo, saan dayta a mabigbig babaen laeng iti iggem a resibo isu a nagkiddaw ti COA ti nayon a palawag ken dokumento.
Maipalagip a nabayagen a kweskwestyunaran dagiti agpampanday linteg kadagiti naisayangkat a panagdenggeg iti House of Representatives idi kallabes ti nagan a Mary Grace Piatos ta kapadana iti napagtipon a nagan iti sikat a chichiria ken restaurant.
