Impasigurado ti Malacañang a nakasagana ti gobierno iti aniaman a gandat nga ikkaten iti puesto ni Presidente Ferdinand R. Marcos Jr. iti baet dagiti mapapati a plano ti kudeta wenno destabilization efforts kontra iti administrasion.
Segun ken ni Palace Press Officer ken Presidential Communications Office (PCO) Undersecretary Claire Castro, nakasagana ti gobierno a sangoen ti aniaman nga addang a manglapped iti urnos ken seguridad ti pagilian.
Siguradoen ti Malacañang a nakasagana dagiti maseknan nga ahensia a mangipasigurado iti kinatalged ti gobierno ken awan ti rason a madanagan ti publiko.
Nagpanawagan pay ti opisyal iti publiko a saan a maallilaw dagiti agiwarwaras iti saan a husto nga impormasyon, ken paneknekanda nga umuna ti damag sakbay a mamati wenno ibinglayda iti social media.
Impaganetget ti Palasyo a natubker ti administrasion ni Marcos ken agtalinaed a nakapokus iti agtultuloy a programa para iti kappia, panagdur-as, ken kinatalged ti pagilian. Augie Arellano
