Saan nga apektado iti Malakanyang iti survey nga inruar ti Pulse Asia nga arigna kagua a Pilipino iti saan a kontento ken saan nga agtalek iti ar-aramiden ni Pres. Ferdinand Marcos Jr.
Segun ken ni Palace Press Officer Atty. Claire Castro, uray ania pay iti rumuar a numero ket agtultuloy iti trabaho ti presidente.
Kinunana nga ammo iti publiko no siasino iti pudno nga agtrabtrabaho ken agserserbi kadagiti umili.
Impaganetget ni Castro a dumdumngeg ti presidente iti arungaing ken kasapulan dagiti umili isu a masapul laeng a luktan iti mata ken lapayag kadagiti pudno a programa iti gobierno.
Maibasar iti nairuar a resulta iti Pulse Asia iti 1st Quarter survey, nakaawat ti presidente iti 36% approval rating ken 35% trust rating idinto a nangatngato ken ni Vice President Sara Duterte iti 55% approval rating ken 54% trust rating.
