Posible a mangitunda iti alarma no mapaneknekan a husto ti mapapati a “secret deal” wenno limed a katulagan ti Priority Development Assistance Fund wenno PDAF case ni Senador Joel Villanueva.
Segun ken ni Palace Press Officer ken Presidential Communications Office (PCO) Undersecretary Claire Castro, napateg a mataginayon ti panagtalek ti publiko iti sistema ti hustisia ti pagilian, ken masapul a naan-anay a maimbestigaran ti aniaman a korapsion wenno limed a katulagan.
Sungbat dayta ni Usec. Castro iti waragawag maipanggep iti mapapati a “secret decision” ni dati nga Ombudsman Samuel Martires iti dismissal case ni Sen. Villanueva idi 2016.
Impaganetget ni Castro a saan a nasken nga agduadua ti publiko iti sistema ti hustisia, nangruna ta ti Ombudsman ti kangrunaan nga institusion a mangkontra iti korapsion, kas panangallukoyna ken ni Ombudsman Jesus Crispin “Boying” Remulla nga adalenna ti isyu tapno maammoan no adda panaglabsing iti linteg wenno iregularidad.
Innayon pay ti opisyal a masapul a siguradoen ti Ombudsman a dumalan amin a desision iti husto a proseso ken umiso a maipakaammo kadagiti maseknan tapno mataginayon ti panagtalek dagiti umili. Augie Arellano
