Kinontra ti Malakanyang ti arigna panagindadalus ni dati a Presidente Rodrigo Duterte mainaig iti mapapati a warrant of arrest kenkuana ti International Criminal Court gapu iti war on drugs kalpasan ti panangsaludsodna no ania ti basulna no apay a kemmegen isuna ti ICC.
Segun ken ni Duterte, inaramidna ti amin tapno maipaay ti kappia ken urnos kadagiti Pilipino iti panagtakemna.
Ngem segun ken ni Palace Press Officer Usec Claire Castro, mismo a ti dati a presidente ti nangaklun kadagiti inaramidna idi simmango iti panagdengngeg ti Senado ken Quad Comm, a nangibilinanna kadagiti pulis nga allukoyen dagiti suspek a lumaban.
Para ken ni Castro, saan a nainkalintegan ti panagpammarang nga inosente ni Duterte, nangruna ta adu a pamilia ti agkidkiddaw iti hustisia iti pannakatay dagiti kabagyanda gapu iti tokhang.
Kinontra pay ti opisial ti angaw ti dati a presidente kadagiti Overseas Filipino Worker idiay Hong Kong nga ipatakderanda iti rebulto no mabalud ta dagiti umili ti nasken a mangibaga no rebbengna met laeng a pagbalinen ti maysa a tao.
