Inallukoy ti Malakanyang ti publiko nga i-report ti aniaman a panagabuso wenno irregularidad iti panagpili ti agbalin a benepisyaryo ti Presidential Scholarship Program.
Pinasingkedan ni Palace Press Officer ken Communications Undersecretary Claire Castro, dagiti reklamo nga adda pakainaigan iti scholarship program ket mabalin nga i-report iti Liga ng mga Barangay national office, Department of the Interior and Local Government (DILG), Presidential Communications Office (PCO), wenno Office of the President (OP).
Sungbat daytoy ni Castro idi masaludsod mainaig iti social media post nga adda pakainaiganna iti anak ti maysa a barangay official a naipadamag a nakaawat ti scholarship iti salinong ti programa.
Innayon pay ti opisial a ti gobierno ket adda mekanismo tapno i-screen ken pumili ti kwalipikado a benepisyaryo.
Iti salinong ti criteria ti programa, ti benepisyaryo ket kasapulan a graduating college students a posible nga ag-drop out gapu iti financial difficulties.
