Dimmepensa ti Malakanyang iti panagpa-surrender kadagiti cellphone ken gadget dagiti reporter iti panagpirma ni Pres. Ferdinand Marcos Jr. iti 2026 national budget.
Segun ken ni Palace Press Officer Claire Castro, saan laeng a media iti nakiddaw nga ag-surrender iti cellphone no diketdi amin a bisita iti seremonya ti P6.793 trillion General Appropriations Act signing idiay Malakanyang.
Inlawlawagna a simmayaat iti programa ta amin a naimbitaran ket focus iti panagpirma ti presidente.
Inikkatna pay ti panagdudua maipanggep ti transparency ken kinunana a naka-livestream iti sibubukel a seremonya.
Ti sarita ti Malakanyang ket kasaruno iti panangbabalaw ti National Union of Journalists of the Philippines (NUJP) iti nasao a phone ken gadget surrender.
Impaganetget ti NUJP a napateg nga alikamen dagiti reporter kadagiti cellphone-da kangrunaan iti napapateg a coverage kas iti panagpirma ti national budget.
