Inkeddeng ti House Committee on Good Government and Accountability a kanselaren ti maika-walo a panagdenggeg ita nga aldaw (November 29, 2024) inaig ti confidential funds iti Office of the Vice President ken Department of Education iti salinong ti panangidaulo ni Vice President Sara Duterte.
Segun ken ni chairman iti komite a ni Manila 3rd District Repp. Joel Chua, gagem ti pangngeddeng a masigurado a matignayan ni Duterte ti subpoena iti National Bureau of Investigation.
Kinunana nga ammoda nga ar-aramaten a rason ni Duterte ti hearing iti Senate Blue Ribbon Committee tapno saan a makasango iti NBI ita nga aldaw.
Impaganetget ni Chua a napateg ti imbestigasyon iti NBI inaig iti pangta ni VP Sara kada President Ferdinand Marcos Jr., First Lady ken House Speaker Martin Romualdez ta maiyaleng-aleng ti seguridad iti pagilian.
