VIGAN CITY – Naimaldit ti maikasangapulo a kaso ti Covid19 iti probinsia ti Abra nga isu ket maysa a seaman, agtawen ti duapulo ket innem nga agnaed idiay Brgy. Malabbaga, La Paz ngem naka-isolate tatta idiay Manila.
June 23 idi napan idiay Metro Manila ti pasyente nga agilaklakad kadagiti dokumento a kasapulanna nga agsubli iti trabaho ngem nagpositibo idi maidalan iti RT PCR testing nga isu ti maysa kadagiti requirement ti employment agency-na.
Awan ti sintomas ti pasyente a tatta ket agtaltalinaed iti maysa a hotel idiay National Capital Region ken maisaysayangkaten iti contact tracing kadagiti nakapulapolna iti pobinsia ti Abra tapno matakuatan no adda naakaran.
Iti agdama, dua ti aktibo a kaso ti nasao a probinsia isu a kanayon nga ipalagip ti Abra provincial government nga agridamda ken sumurot kadagiti pagannurotan.
