Nainget a nagpakdaar ti Social Security System dagiti pensioners a leppasen ti Annual Confirmation Pensioner wenno ACOP compliance sakbay malpas ti bulan ti Abril.
Daytoy ket tapno maliklikan ti posible a pannakaitantan iti panagawat ti binulan a pension.
Partikular nga imbilin ti ahensia nga agipasa ti kasapulan a dokumento ita a bulan dagiti retirement pensioner nga agtawen ti 80 ken agtaltalinaed iti pagilian, dagiti totally disability pensioner ken dagiti pensiyonado a naka-base iti sabali a pagilian.
Karaman pay iti masapul nga ag-comply dagiti survivor pensioner, kasta pay dagiti dependent children nga adda iti salinong ti guardianship.
Tapno naparpardas ti proseso, inallukoy ti SSS dagiti benepisyaryo nga aramiden ti online compliance babaen ti National ID eVerify System nga imatmatonan ti Philippine Statistics Authority (PSA).
