Manamnama a sumango iti panagdengngeg ti House Committee on Justice ti sumagmamano nga opisial ti gobierno ken dadduma pay a resource persons iti agtultuloy a panagsukisok iti impeachment complaint kontra ken ni Bise Presidente Sara Duterte inton bigat April22, 2026.
Segun ken ni Justice Committee Chairperson ken Batangas 2nd District Rep. Gerville Luistro, karaman iti naimbitaran da Ombudsman Jesus Crispin Remulla, dati a Senador Antonio Trillanes IV, opisial ti Anti-Money Laundering Council (AMLC), ken dadduma pay a mangilawlawag dagiti alegasion kontra iti bise presidente.
Gagem ti panagdenggeg a sukisoken ti maipagarup a kellaat a panagdakkel ti baknang ni VP Sara ken ti isyu ti saan a husto a panangideklarar ti Statements of Assets, Liabilities and Net Worth (SALN), a mabalin a sumrek iti kaso a “betrayal of public trust.”
Manamnama nga ipresenta ni Ombudsman Remulla ti kopya ti SALN ti bise presidente manipud iti agduduma a tawen, idinto a ni Trillanes ti mangted met ti testimonia mainaig iti immuna nga alegasion mainaig iti nakadulin a baknang ni VP Sara ken ti ama na a ni dati a Presidente Rodrigo Duterte.
