Agtultuloy ti panangduktal ti Magsingal Police Station kadagiti anggulo a mabalin a makaitudo kadakuada no ania ti pudno a motibo iti pannakapaltog ti maysa a babai iti sangwanan ti pagtaenganna idiay Barangay Panay Sur.
Pimmusay bayat ti pannakatamingna ti biktima nga agtawen iti uppat a pulo ket walo, agnaed iti nasao nga ili.
Iti pannaki-uman ti Bombo Radyo Vigan ken ni PLT. William Costales, Deputy Chief of Police iti Magsingal Police Station, adu dagiti madakdakamat ti pamilina a posible a rason ti nakatayan ti biktima nga isu ti ikagkagumaanda nga imbestigaran.
Nakita met basar iti panangkitada kadagiti CCTV footages nga adda dua a lalaki a nagkalubbon iti motorsiklo a saanen a mabigbig ti plate number-na.
Innem a bala ti mapapati a calibre 45 a paltog ti naitama iti bagi ti biktima a puon ti nakatayanna.
