Maisayangkat ti Rite of Sealing iti lungon ti pimmusay a lider ti Simbaan Katolika a ni Pope Francis inton alas otso iti rabii ita nga aldaw, Abril 25 idiay Vatican wenno alas dos iti parbangon ti Sabado, Abril 26 ditoy pagilian.
Maisayangkat daytoy iti maaramid a liturgical rite nga idaulwan ti Carmelengo ti Holy Roman Catholic Church a ni Cardinal Kevin Farrell iti St. Peter’s Basilica a nakamasayagan ti bangkay ni Pope Francis.
Dar-ayan daytoy dagiti dadduma a Cardinal ken dagiti opisial ti Holy See.
Kiniddaw met ti Office for the Liturgical Celebrations ti kaadda da Cardinals Giovanni Battista Re, Pietro Parolin, Roger Mahony, Domenique Mamberti, Mauro Gambetti, Baldassare Reina, ken Konrad Krajewski iti maisayangkat a Rite of Sealing iti lungon ni Pope Francis.
Ti liturgical rite ti mangipasimudaag iti panagleppas ti public viewing iti St. Peter’s Basilica.
Maaramidto met ti funeral mass para iti pimmusay a Santo Papa inton bigat, Sabado Abril 26 iti alas dies ti agsapa idiay St. Peter’s Square, alas kuatro met iti malem ditoy Pilipinas.
