Nasurok kumurang PHP780,000 ti gatad a natakaw manipud iti Premia LPG Refilling idiay Barangay Mambug, Sta. Cruz, Ilocos Sur.
Nabigbig ti biktima wenno akinkukua a ni Kansu Go Chan, agtawen iti pitopulo ket maysa, taga-Barangay Poblacion Este, Sta. Cruz idinto a saan pay a nabigbig dagiti suspek.
Segun kadagiti secretary ti nasao nga LPG refilling a da Raquel Rabaca Toquero ken ni Oliva Rentar Perado, alas syete singkwenta iti agsapa ti Agosto 26, idi makasangpetda iti cashier’s office, napan ni Perado iti kusina ti opisina ken nadlawna a napursar a nalukatan ti tawa isu nga iniyabanna ni Toquero.
Kinitada a dagus ti opisina ni Marilou Berzabal Amorin a maysa met laeng a secretary ket natakuatanda a nalukatan ti vault ken ti cashier’s box ken mapukpukawen ti nasao a gatad.
Dinadael pay dagiti suspek dagiti CCTV iti nasao nga establisimiento.
Sakbay ti panangdadael kadagiti CCTV, maysa a lalaki a nakasuot iti kallugong, mask, long sleeves, pants ken gwantes ti nangitaray iti kuarta kas makita kadagiti CCTV.
