Lima a pasahero ti nadunor iti pannakatinnag ti naglugananda nga SUV iti kapagayan idiay Sitio Saoil, Poblacion, Quirino, Ilocos Sur.
Nabigbig ti nagmaneho ti Toyota Fortuner a ni Randy Tumbaga Igarta, agtawen iti uppat a pulo ket lima, naasawaan, taga-Brgy. Curtinn, Sinait.
Dagiti pasahero ket da Lester Altarejos Aaron, agtawen iti tallopulo, taga-San Pedro, Vigan City; Maxie Carriage Tolentino, agtawen iti tallopulo ket innem, taga-Badoc, Ilocos Norte; Norvele Sagun Pang-Oden, agtawen iti duapulo ket pito, taga-Sudipen, La Union; Kathleen Pio Agcaoili, agtawen iti tallopulo ket lima, naasawaan taga-Poblacion North, Lidlidda ken ni Atty. Laarni Eleng Bañez Tumacdang, taga-Barangay Rubio, Galimuyod.
Iti pannaki-uman ti Bombo Radyo Vigan ken ni Police Lieutenant Giovanie R. Bisnar, Deputy Chief of Police ti Quirino Municipal Police Station, agpapa-abagatan ti SUV idin ta nagpalya ti preno ti lugan ket saan a nakontrol ti drayber ti manibela isu a naitinnagda iti kapagayan a sangapulo ket lima a kadapan ti kangatona.
Amin a pasahero ket nadunor ken insigida a naipan idiay Quirino Hospital idinto a saan a naan-ano ti drayber.
