VIGAN CITY – Panaglabsing iti Presidential Decree 1602 wenno Anti Illegal Gambling Act ti sangwen dagiti lima a nagsusugal idiay Brgy. Nambaran, Sto. Domingo a nakemmeg iti Anti Illegal Gambling operation.
Dagiti suspek ket da Crisanto Pando, agtawen iti uppat a pulo ket siam, mannalon; Richard Begonia Sevilleja, agtawen iti tallopulo ket siam, construction worker; Dionisio Tabangin, agtawen iti limapulo ket uppat, mannalon; Archie Calingp, agtawen iti tallopulo ket innem, mannalon nga agpapada a taga-Brgy. Nambaran idinto a da Kerby Jaramillo, agtawen iti duapulo, maysa a karpentero ket taga-Brgy. Paras.
Iti pannaki-uman ti Bombo Radyo Vigan ken ni PSSG. Maximino Ramos, naaktuan dagiti suspek nga agaayam iti Lucky 9 iti pagtaengan ti natay a ni Hilario Tabangin idiay Brgy. Nambaran a puon ti nakakemmeganda.
Malaksid ti dayta, posible a matiketanda gapu ti panaglabsingda iti health protocol ken iti executive order nga imparuar ti provincial government inaig dagiti pagannurotan iti natayan.
Naala kadakuada ti uppat a piraso ti baraha, pusta a PHP 1,997 a naipanen iti Sto. Domingo PNP pakairamanan dagiti suspek tapno maidalan iti husto a proseso.
