VIGAN CITY- Natay dagiti agina a da Inesita Defiesta, agtawen iti walo pulo ket maysa kenni Cesar Defiesta, agtawen iti lima pulo ket dua, agpada a taga-Bessang, Burgos, gapu iti panangbagkong kadakuada ti kabagyan da a ni Andres Tan Defiesta Jr nga agtawen iti sangapulo ket siyam.
Inaklon ti suspek a sakbay iti napasamak ket tinakawan na ti apong na a baket ken uliteg na, kadua na iti maysa a menor de edad ngem inranta nan a papatayen dagiti biktima gapu ta segun kenkuana ket nauman iti kinaimot da kenkuana iti laksid a dagiti biktima iti nangpadakkel kenkuana.
Malaksid iti dayta, inaklon pay ti suspek a dati nga agar-aramat iti iligal a droga.
Kabayatanna, segun ken ni Police Senior Inspector Leonilo Ancheta, hepe ti Burgos municipal police station, natunton da ti suspek babaen iti tugot ti tsinelas na manipud iti nakapasamakan iti krimen agingga iti pagtaengan da.
Maibasar iti imbestigasyon, binekkel ti suspek ti baket sakbay na a binagsol iti namin-adu a daras iti tengnged ken naduma-duma a paset iti bagi na sa insaruno na a binagbagkong ti uliteg na a nakakita iti panangpatay na ti baket.
