VIGAN CITY – Kaso a panaglabsing ti Republic Act 10591 wenno illegal possession of firearms and ammunition act ti sanguwen ti maysa a lalaki a natiliwan nga adda ikot na a paltog iti insayangkat a checkpoint ti Sto. Domingo municipal police station idiay Barangay Poblacion, Sto. Domingo idi rabii, December 12.
Nabigbig ti suspek a ni Reynaldo Umbay, maysa a gwardya ken agnaed idiay Maratudo, Magsingal.
Pinasingkedan ni Police Captain Christopher Ramat, hepe ti Sto. Domingo PNP a sitaren da kuma ti suspek ta saan a naka-helmet a nakalugan iti motorsiklo kadua na ti ading na ket idi inasitgan na, impurwak na ti bag na nga isu iti nakakitaan da nga adda iti ikot na a paltog nga adda bala na.
Pinaglibakan ti suspek a kukuana iti paltog nga adda kenkuana ta binulod na laeng iti gayyem na ken saanen a mabalin a mausar pay ta dadael ngem segun ken ni Ramat, mabalin pay a mausar.
