VIGAN CITY – Naipan iti ikot ti Vigan City police station ti maysa a lalaki a naalaan ti paltog ken bala iti uneg ti Lyric Resto Bar idiay Barangay 8, Vigan City idi alas onse dyes idi rabii, October 8.
Nabigbig ti suspek a ni JV Quinsay nga agtawen ti sangapulo ket walo, baro ken agnaed idiay Barangay Camanggaan, Vigan City.
Nakaawat iti tawag iti cellphone ti Vigan City PNP nga adda ti maysa a lalaki a nakaiggem ti paltog iti uneg ti nasao a resto bar isu nga insigida a nagresponde dagiti kameng ti linteg.
Naala iti ikot ti suspek ti maysa a homemade caliber 22 revolver ken maysa a sling bag a naglaon ti maysa a bala ti caliber 50, maysa a bala ti caliber 30 ken maysa a bala ti caliber 7.62.
Agsipud iti dayta, posible a sumango ti suspek iti kaso a panaglabsing ti Republic Act 10591 wennu Comprehensive Firearms and Ammunition Regulation Act.
