Maysa a lalaki ti natakawan iti sumagmamano a piesa ti motorsiklona idiay Barangay Sived, Sto. Domingo, Ilocos Sur.
Nabigbig ti biktima a ni Alex Rivera Reotiris, agtawen iti limapulo ket tallo, construction worker ken residente iti Brgy. Sived, Sto Domingo.
Ti met suspek ket ni Reynald Lester Pando, licensed mechanic ken residente iti Brgy. Nagbettedan, Sto. Domingo.
Nagreport ti biktima iti Sto. Domingo Police Station a mapukpukaw dagiti dadduma a parte ti makina ti Kawasaki Beja100 a motorsiklona.
Segun iti biktima, intalekna nga ipatarimaan iti suspek ti motorsiklona ken nagpakauna iti P3,500 a bayad ngem imbes a tarimaanenna ket tinakawna dagiti dadduma a parte iti lugan sa inlakona.
Naamuan babaen ti sabali a mekaniko a ti mapukpukaw a parte iti motorsiklo ket aggatad iti P11,000.
Kiniddaw ti biktima iti suspek a tarimaanenna ti motorsiklo ngem saanna nga impangag isu nga impakaammonan iti kapulisan.
