Nasarakan a natay ti maysa a lalaki iti maysa a karayan kangrunaan iti spillway iti nagbeddengan ti Langlangca 1st, Candon City ken Casilagan Sur, Banayoyo, Ilocos Sur.
Ti nasao a lalaki ket agtawen iti duapulo ket uppat a taga-Nagyubuyuban, San Juan, La Union a nagbakasyon iti siudad ti Candon.
Iti pannaki-uman ti Bombo Radyo Vigan ken ni PCapt. Medward Galay nga Acting Chief of Police iti Banayoyo Municipal Police Station, alas otso iti bigat iti December 26, 2025 idi rimmuar ti biktima iti pagtaengan ti kabagyanda a nagbakasyonanna ngem saan a nagpakada no sadino iti papananna isu a nakigtotda laengen idi nadamagda nga awanen iti biagna.
Segun ken ni Galay, posible nga aksidente a natinnag iti karayan ti biktima bayat iti panagdalyasatna a nakabisikleta iti spillway ta patta-pattaenda a naawanan iti preno isu a nagsagaba iti nakaru nga injury iti ulona ken simmaruno iti pannakalmesna.
Inlawlawag ni Galay a ti nasao a paset ket agsalog isu a no saan a makontrol iti lugan ken no awanan iti preno iti bisikleta a maaramat ket posible a madisgrasya.
Balakad ni Galay iti publiko nga ikabesada nga umuna dagiti dalan a dalyasatenda sakbay iti panagmaneho gapu iti critical safety practice ta makatulong dayta iti agduduma a kondisyon ken posible a peggad.
