Maysa a lalaki iti pinaltogan iti saan pay a nabigbig a suspek bayat iti panagmotorsiklona nga agawid idiay Barangay Baliw Laud, Sta. Maria, Ilocos Sur idi rabii, February 20, 2026.
Ti biktima ket agtawen iti duapulo ket pito, baro, partidor nga agnaed iti nasao a lugar idinto a saan a nabigbig ti suspek.
Iti pannaki-uman ti Bombo Radyo Vigan ken ni PLt. Jenson Refuerzo nga Officer-in-Charge iti Sta. Maria Municipal Police Station, agaw-awiden ti biktima iti pagtaenganda babaen iti panagmanehona iti Yamaha NMAX motorcycle ta naggapu iti galyeraan idin adda immasideg kenkuana a nakamotorsiklo met laeng ket pinaltoganna iti namin-ano a daras iti likodna sa naglibas a nagturong iti amianan a direksyon.
Segun ken ni Refuerzo, dua iti tama iti bala ti paltog ti sinagaba ti biktima isu nga iti agdama ket agpapaagas iti Metro Vigan Cooperative Hospital.
Kinunana pay a nasarakan iti nakapasamakan iti pammaltog iti tallo a piraso iti spent shells ken maysa nga slug iti caliber 45.
Innayonna nga awan ti rekord idi kallabes ti biktima iti barangayda ken awan iti kinasungbatna idi naggapu iti galyeraan isu a burburtia iti rason iti panangpaltogda kenkuana.
Kabayatanna, kinuna ti ama ti biktima a sakbay iti pannakalpaltog ti biktima ket adda lalaki a nakikuykuyogda iti galyeraan a saanda nga am-ammo ngem inliblibrena pay ta kaduada a nagmeryenda ken nakipagpusta.
Maysa pay a patien ti ama ti biktima a posible nga adda pakainaigan ti babai a nagkiddaw ti pabor iti putotna a pag-imonen ti lakayna ta amangan no napagurada.
No pay kasta ket inlanad ti biktima iti amana a saanna a nalasin ti suspek a nangpaltog kenkuana ta napansinna laengen nga idi agawid ket adda mangsursurot kenkuana ket idi dandanin makadanon iti pagtaenganda ket isun iti panangpaltogda kenkuana.
