Agdama a matamtaming iti ospital ti biktima iti pammaltog idi kalman November 22, 2025 idiay Barangay Cabaroan, Magsingal, Ilocos Sur.
Ti biktima ket agtawen ti tallopulo ket innem, naasawaan, pintor, kabayatan a ti met suspek ket agtawen ti tallopulo ket lima, lending collector, nga agpada a residente ti nasao nga ili.
Iti pannakiuman ti Bombo Radyo Vigan ken ni PLT. Richard Pajo, napan gimmatang ti biktima iti maysa a sari-sari store ket sinurot daytoy ti suspek ket dita a pinaltugan-na ti biktima iti naminsan a daras.
Naaramat iti pammaltog ti calibre 32 ket napuntaan ti tengged ti biktima a naitaray iti balay pagagasan para ti pannakatamingna.
Naammuan a ti biktima ket dati a suspek iti pammagsol a ti biktima ket iti kayong ti nagbalin a suspek ita ti pammaltog.
Addan ti suspek ken ti nausar a paltog iti kustodiya ti Magsingal Municipal Police Station para ti naan-anay nga imbestigasyon. Reynand Fontejon
