VIGAN CITY – Nakemmeg ti maysa a lalaki a nagasot- asot iti paltogna iti sanguanan ti maysa a Bakery idiay Quinnarayan, Narvacan idi November 7 ti agdama a tawen.
Segun kenni Police Captain Arcadio Viloria, hepe ti Narvacan municipal police station, adda nawatda a report manipod kadagiti pannakabagi ti linteg idiay ili ti Nagbukel nga adda ti lalaki nga agasot-asot iti paltog na iti nasao a lugar.
Nabigbig ti suspek a ni Arnolfo Roldan, agtawen ti lima pulo ket uppat, naasawaan ken agnaed idiay Lungog, Narvacan.
Idi nagresponde dagiti pannakabagi ti linteg ti Narvacan, saan da a nadanun ti suspek ngem adda nakaibaga kadakuada nu nagturungan na a direksyon.
Idi sinurot dagiti pannakabagi ti linteg ti direksyon nga intudo ti maysa a barangay tanod a mapapati a nagturungan ti suspek, nadanun da idiay pag-gasolinaan iti nasao a lugar ket idi asitganda, pinaglibakan na iti pammabasol kontra kenkuana ngem sinukimat da iti compartment iti lugan na ket nakita da ti maysa a Calibre 45 nga adda magazine na ngem awan iti bala ken adda pay ti maysa a reserbana a magazine nga adda ti maysa a balana.
Nakaro ti bartek ti suspek nga isu iti posible a rason nu apay nga inpangas-pangas na iti paltog na.
Saan laeng nga idiay Barangay Quinnarayan iti napan na nangipangasan iti paltog na nu di ket immun-unan nga inaramid na iti nasao a banag idiay Barangay Sta. Lucia nga isu iti napan na naki-inninuman.
