VIGAN CITY – Mamati ni Bernabe Medrano nga awan iti foul play iti mapapati a pannakalmes ti putot na a ni Victoriano Medrano nga agtawen ti lima pulo ket maysa a nasarakan iti bangkay na a tumtumpaw iti paset ti Barangay Nagsangalan a sa laeng madanuman nu agtudo iti napigsa, idi agsapa idi kalman, September 5.
Ngem, segun ken ni Medrano, ipalubos na latta nga i-autopsy dagiti otoridad tapnu maamuan iti pudno a rason nu apay a natay ti putot na a napan laeng naki-inninom iti pagtaengan ti kabsat na idi rabii ti September 4.
Ti bangkay ti biktima ket nakita ti kabagyan na met laeng a ni Jerome Pato idi mapan kuma agiyalis iti taraken na a kalding.
Segun ken ni Pato, nakita na nga adda iti tumtumpaw iti nasao a lugar ket idi mining-mingan na tao met gayam isu nga insigida a nagpaarayat kadagiti kalugaranda tapnu maitakdang ti bangkay.
Nagna iti kadanuman ti biktima ta posible a linisyan na dagiti nakapenpen a bulong ti niyog iti sigud a pagpagnaan na nu mapan makikarruba, nga isu metten iti poon iti mapapati a nakalmesan na.
