Nabigbigen ti lamu-lamo a bangkay a nasarakan a naiwalang iti Diversion Road idiay Barangay Cabalangegan, Vigan City, Ilocos Sur.
Daytoy ket ni Leonardo Esteban Duque, agtawen iti uppat a pulo ket tallo, taga-Subadi Sur, Burgos, nga immay binigbig ti kabsatna a ni Richard Duque idi rabii iti oras ti alas onse bainte.
Iti pannaki-uman ti Bombo Radyo Vigan ken ni PLTCOL Reynaldo Mendoza Jr., Officer-in-Charge ti Vigan City Police Station, ti biktima ket nabalud idin iti lima a tawen gapu iti pannakainaigna iti iligal a droga ngem naabswelto.
Maibasar iti imbestigasyon, malem ti Agosto 6 idi naudi a nakita ti biktima iti family house da nga adda katintinnawagna ken agkatkatawa.
Nasurok duapulo ket uppat nga oras met a nagpukaw agingga a natakuatan a naiwalang ti bangkay ti biktima nga adda ti sangapulo ket maysa a tama ti paltog iti bagina.
Dua a lugan a nakita iti CCTV footage ti im-imbestigaran pay a naan-anay dagiti otoridad para iti pakabigbigan dagiti suspek.
Saan pay a masinunuo no idiay Burgos ti nangpatayanda ti biktima ta awan ti narekobre a slug iti nakasarakan iti bangkayna.
