Natay ti lalaki a nagmotorsiklo ta naatalan iti maysa a trailer truck iti national highway idiay Barangay Bannuar, San Juan, Ilocos Sur idi alas sais kuarenta idi rabii, January 27, 2025.
Nabigbig ti nagmaneho iti black and red SYM motorcycle ket ni Edwin Tabuno Peneyra, agtawen iti uppat a pulo ket siam, baro, promodicer, nagaramat iti helmet, awanan ti reflectorized vest, nga agnaed idiay Barangay Cacandongan, San Juan.
Ti met nagmaneho iti trailer truck a color white ket ni Aries Visaya Aquino, agtawen iti uppat a pulo ket dua, naasawaan, nga agnaed idiay Bacarra, Ilocos Norte.
Agpada nga agpapabagatan a direksyon dagiti dua a lugan idin nadanonda iti nasao a lugar ket impadas nga inovertake-an iti nakamotorsiklo ti trailer truck iti shoulder part iti national highway ngem naawanan ti kontrol a gappuanan ti pannakatumbana ket saan a napansin ti nagmaneho iti truck a napilidanna ti nakamotorsiklo isu a nagtultuloy a nagturong iti bagatan a direksyon.
Nagsagaba ti head injuries ti nagmaneho iti motorsiklo isu a naipan iti Magsingal District Hospital babaen kadagiti nagresponde a Municipal Disaster Risk Reduction and Management personnel iti San Juan ngem naideklarar a natay babaen ti attending physician-na a ni Dr. Siena Tabarrejo.
Insigida a naipakaammo kadagiti kaasideg nga istasyon ti pasamak a gappuanan ti pannakakita iti trailer truck dagiti kameng iti Santa Municipal Police Station iti ili ti Santa.
