Dead on arrival iti ospital ti lalaki a nagmotorsiklo gapu iti pannakaidungparna iti kongkreto a poste iti national highway idiay Barangay Labut Norte, Santa, Ilocos Sur a napasamak itay alas singko baente kuatro iti malem, June 9, 2025.
Ti driver iti Honda Click a motorsiklo ket ni Joshua Manzano Cabanit, agtawen iti duapulo ket tallo, addaan ti driver’s license nga agnaed idiay Barangay Lungog, Narvacan.
Bayat iti mobile patrolling da PSSg. Montero ken Patrolman Bragado iti Santa Municipal Police Station nga agturong iti amianan a direksyon, nakitada iti nakamotorsiklo nga agturong iti bagatan a direksyon idin naawanan ti kontrol iti manibelana a gappuanan iti pannakaidungparna iti kongkreto a poste iti laud a paset iti kalsada.
Insigida a nagresponde dagiti otoridad ket nagpatulongda iti Santa Municipal Disaster Risk Reduction Management Office ket impanda ti driver iti motorsiklo iti Ilocos Sur District Hospital-Narvacan.
Nupay nakaaramat iti helmet ti driver ti motorsiklo ket naideklarar a dead on arrival babaen ti attending physician na a ni Dr. Mary Grace Asuncion gapu iti fatal head injury ken dunor iti nadumaduma a paset ti bagina.
