Dead on arrival ti maysa a lalaki a nagmaneho iti e-bike ta maipagarup a biktima ti hit-and-run iti national highway idiay Brgy. San Antonio, Narvacan, Ilocos Sur.
Ti nagmaneho ti e-bike ket agtawen ti tallopulo ket tallo, naasawaan, ceiling installer ken residente ti Brgy. Nanguneg East, Narvacan.
Ti met lugan a maipagarup a nakadungpar iti e-bike ket maysa nga elf truck a saan pay a nabigbig no siasino ti nagmaneho.
Iti pannaki-uman ti Bombo Radyo Vigan ken ni PMAJ. Rojer Balingoay Jr. iti Narvacan Municipal Police Station, ti e-bike ket adda iti shoulder lane nga agturong iti bagatan a direksion kabayatan a ti elf-truck ket agturong iti amianan a direksion, ket idi nadanonda ti nakapasamakan ti insidente, immagaw ti linya ti elf truck a nakaitunda ti pannakadungparna ti e-bike.
Dagus a nagresponde dagiti kameng ti Narvacan Municipal Police Station ket nasarakandan ti biktima a nakaidda iti igid iti e-bike kabayatan a ti elf truck ket timmaray kalpasan a napasamak ti insidente.
Naitaray ti biktima iti ospital ngem naideklarar a dead on arrival.
Narekobre iti nakapasamakan ti insidente ti nabettak a temporary plate ti lugan a mapapati a nang hit and run iti biktima.
Kabayatanna, segun ken ni Apple Jane Bermudez a kasinsin ti biktima, naggapu ti biktima iti kabagyan da idiay Barangay Limmansangan ken napan pay iti barkadana idiay Barangay Quinarayan sakbay a napasamak ti insidente.
Inladawan ni Apple iti kasinsinna a maysa a nasingpet iti dua nga anak-na a naulila.
Kiddaw ni Apple kadagiti posible a nakakita iti napasamak wenno makaitudo ti nakadungpar a tumulong a mangtunton tapno maipaayan ti hustisya iti kasinsinna. Reynand Fontejon
