Nagturong iti engkwentro ti napasamak a panagresponde dagiti pannakabagi ti linteg iti maysa a lalaki a nagideliver iti mapapati nga iligal a droga idiay Ilocos Sur Provincial Jail.
Napasamak ti engkwentro dagiti pannakabagi ti linteg ken ti suspek iti Diversion Road a sakupen ti Barangay Cabaroan, Bantay, Ilocos Sur.
Ti suspek ket ni Sherwin Pugal, taga-Capangpangan, Vigan City.
Nagresponde dagiti pannakabagi ti linteg ket idi makasangpetda iti Provincial Jail, natinnag ti suspek ti mapapati nga iligal a droga.
Naglibas ti suspek babaen iti traysikelna isu a sinurot met dagiti pannakabagi ti linteg.
Idi makadlaw nga adda mangsursurot kenkuana, nagpaputok ti suspek kadagiti pannakabagi ti linteg isu a bimmalesda met.
Nagsagaba ti suspek iti tama ti paltog iti bagina ken naipaagas iti ospital para iti pannakatamingna.
Naala ti tallo a piraso ti empty shell ti 9mm ken maysa a unit homemade caliber 38.
Agtultuloy ti imbestigasyon dagiti pannakabagi ti linteg iti nasao a pasamak.
