VIGAN CITY – Nasayaaten ti kasasaad ti lalaki a nadunor iti ulo ken dadumaduma a paset ti bagina kalpasan ti pannaka-aksidentena idiay Barangay Calay-ab, Sto. Domingo, Ilocos Sur iti oras ti alas dies trenta iti rabii idi August 3, 2024.
Ti nagmaneho ti Sniper Yamaha 155 a motorsiklo ket ni Alfonzo Ayon Ayon Tabon Jr., agtawen iti duapulo ket innem, awanan ti helmet a taga-Zone 3, Barangay Manzante, Magsingal.
Iti pannaki-uman ti Bombo Radyo Vigan ken ni PLt. Benito Ponce Jr. manipod Sto. Domingo Municipal Police Station, adda ti timmawag kadakuada a concerned citizen a nangipakaammo ti pannakakitana ken ni Tubon a naaksidente isu a nagrespondeda.
Segun ken ni Ponce, naamoan nga agaw-awid idin ni Tabon bayat a nakamotorsiklo ta naki-inninom idiay Calay-ab, Sto. Domingo idin nadanonna iti agsikko a paset iti kalsada ket saanna a nakontrol ti manibela ti luganna a gappuanan ti pannakaaksidentena.
Naipan ni Tubon iti ospital para ti pannakatamingna idinto a naipan iti kustodiya ti Sto. Domingo Police Station ti motorsiklo nga inaramatna para ti proper disposition.
Kabayatanna, tallo ti linabsing ni Tabon ti salinong ti Municipal Ordinance ta saan a nagaramat ti helmet, awan ti lisensyana ken naka-inom iti arak idi nagmaneho.
