Nagpanawagan ni House Deputy Minority Leader ken ACT Teachers Partylist Rep. Antonio Tinio ken ni House Speaker Faustino Bodjie Dy III a saan a palubosan ti kiddaw a travel clearance ni Davao City 1st District Rep. Paolo Duterte tapno makabiahe iti sangapulo ket pito a pagilian manipod December 15, 2025 agingga February 20, 2026.
Segun ni Tinio, ti kiddaw ni Duterte ket abuso para kadagiti umili a mangpaspasueldo kadagiti elected representatives kas public servants.
Impaganetget ni Tinio a saan a napintas no mapalubosan ti personal a lakad nga agturong iti abroad ni Duterte iti panawen nga adda session iti Kamara.
Kinunana a saan a miss universe ni Duterte tapno aglikmot iti agduduma a pagilian ta ti trabahona ket iti mangibagi ti distritona tapno maiduron iti interest ti constituents-na kadagiti committee hearings iti Kamara ken iti plenary session.
Makapadudua para ken ni Tinio ti timing ti plano a panagbiahe iti abroad ni Rep. Paolo iti panawen nga imimbitaran isuna ti Independent Commission for Infrastructure tapno sumungbat iti sumagmamano a saludsud kadagiti public infrastructure projects iti distritona nga agingga ita ket saan pay a nasungbatan iti aniaman a forum.
Impalagip ni Tinio a saan a mabalin ti apela ni Duterte a palubosan isuna a dumar-ay kadagiti session ken committee hearings iti virtual ta maipalubos laeng dayta kadagiti emergency situations.
