VIGAN CITY – Adda iti kit-kitaen ti Tagudin municipal police station a kaso nga agdama nga iggem ni Judge Mario Anacleto Bañez a konektado ti iligal a droga a posible a maysa kadagiti anggulo iti pannakapapatay na idi naminsan nga aldaw idiay Mameltac, San Fernando City, La Union.
Ngem segun ken ni Police Captain Omar David, hepe ti Tagudin PNP, saan da pay laeng a mabalin nga ibuksilan dagiti naan-anay a detalye iti kaso nga iggem ni Judge Bañez agsipud ta manarimaan pay laeng iti naun-uneg nga imbestigasyon da.
Ti laeng nadakamat ni David ket posible a dakkel a personalidad iti konektado iti nasao a kaso agsipud ta ti kadagsen iti iligal a droga a karaman iti kaso ket agdagsen ti maysa a kilo.
Kiniddaw ti hepe kadagiti adda ammo na inaig iti pannakapapatay ti nasao a judge a makikinnammayet da kadakuada wennu idiay San Fernando City police station tapnu maipaayan iti hustisya iti napagteng ti biktima.
