VIGAN CITY – Al-allukoyen ni Capt. Rogelio Dumbrique ti kakadua dagiti natay a kameng ti New Peoples Army a nakaengkwentro dagiti militar idiay Namatican, Sta. Lucia idi February13 nga isuda Ka Gili a taga Ilocos Sur; Abelino Cruz alyas Ka Junel a taga- Sta. Lucia ken ni Ka Dindo a tubo ti Abra pakairamananen dagiti nabatbati pay a miembro tapno sumukodan iti gobierno ket matulonganda nga agbalbaliw.
Ti pannaki-uman ti Bombo Radyo Vigan ken ni Dumbrique, nabigbigen iti pudno a kinatao dagiti natay a nangangato a lider ti Kilusang Larangang Gerilya – Southern Ilocos Sur agsipud ta adda dagiti kameng ti pamilya da a napan nangala kadagiti bangkay da iti punerarya a nakaipanan dagiti bangkay da.
Dagiti natay ket isu da Julius Zamora Marquez alyas Ka Guyo kenni Iñibel Marquez alyas Ka Unor nga asawa na a taga- Baligayan, San Quintin, Pangasinan. Ni Ka Guyo ket isu ti Secretary ti KLG-SIS idinto a ti asawa na a ni Ka Unor ket isu ti deputy secretary ti grupo.
Kabayatanna, ni Maria Finela Cavero alyas Ka Ricky a taga Poblacion, Urdaneta City, Pangasinan ket isu ti political guide ti Team 2 ti KLG- SIS.
Nadakamat ni Dumbrique a ti pagtaengan a nagkamanganda idi February 13 ket kanayonda a pappapanan ken kunana a pinatayda idi ti akinkukua agsipud ta atapenda a supporter dagiti otoridad.
Ti KLG -SIS ket isu met laeng ti Alfredo Ceasar Command a grupo dagiti NPA a nakarinnupak dagiti militar idiay Nagbukel idi napalabas a bulan ken idiay Pilar, Abra idi napan a lawas.
