Inikkaten ti Department of Agriculture (DA) ti temporaryo nga import ban iti wild ken domestic birds manipod idiay Argentina, Romania, ken Turkey.
Dayta ket kalpasan a nakontrol ti panagwaras ti highly pathogenic avian influenza (HPAI) kadagiti nasao a pagilian.
Nangiruar ni DA Secretary Francisco Tiu Laurel Jr. ti agsina a memorandum order a mangipalubos iti panagangkat manen kadagiti nasao a produkto.
Kinunana nga awan ti baro nga outbreak kadagiti nasao a pagilian kalpasan a nangted ti clearance ti World Organization for Animal Health (WOAH).
Ti pannaka-ikkat ti ban ket kasapulan ti addang ta napateg ti poultry iti panangsigurado ti seguridad iti taraon ken ti panangted ti pagbiagan ken oportunidad iti agri-business.
Makatulong iti panaglukat manen iti natalged nga import channels iti panangpatibker iti suplay ken presyo iti taraon.
Maipalagip a naipatungpal ti import ban tapno masalakniban ti lokal nga industriya iti poultry iti Pilipinas kontra iti panagwaras ti bird flu.
