Idurduron ni Nueva Vizcaya Rep. Timothy Joseph “Tim” Cayton ti House Bill 9331 wenno gakat a mangted iti nayon a suportar kadagiti kameng iti gobierno iti baet iti agtultuloy a panagpangina ti presyo ti taraon, plete, kuryente, gasolina, agas ken dadduma pay a kangrunaan a pagkasapulan.
Target ti gakat nga amyendaran ti Personnel Economic Relief Allowance (PERA) dagiti empleado iti gobierno ken maipangto iti P9,000 kada bulan manipod iti agdama a P2,000.
Sakup ti gakat dagiti regular, casual, contractual, appointive, ken elective government employees nga adda iti salinong ti Compensation and Position Classification Act.
Segun ken ni Cayton, rumbeng a mapapigsa ti suportar para kadagiti mangisursuro, polis, nurse, suldado, kameng iti lokal a gobierno ken dadduma pay nga agtultuloy nga agserserbi iti ili iti baet iti dumakdakkel a gastos iti inaldaw.
