Idurduron ni investment czar ken Finance Secretary Frederick Go ti foreign investment iti renewable energy tapno mapapigsa ti suplay ti kuryente, makapartuat ti trabaho ken makatulong iti ekonomia iti pagilian.
Gagemda a suportaran ti programa ti Marcos Administration a makaallukoy iti ad-adu nga agpuonan, mapapigsa ti suplay ti enerhiya, makaaramid ti trabaho ken mangted ti napaut a benepisyo kadagiti Pilipino.
Nakitaripnong ni Secretary Go kadagiti opisyal ti Copenhagen Infrastructure Partners (CIP) tapno mapapigsa ti pannakaipatakder ti 901-megawatt (MW) San Miguel Bay Offshore Wind Power Project idiay Camarines Sur.
Apaman a malpas ket manamnama nga agbalin a kaunaan nga offshore wind farm ti proyekto iti Pilipinas ken iti intero a Southeast Asia.
Napagpapatangan iti taripnong ti napateg nga addang iti proyekto, panagpondo ken panagsagana para iti umadanin a Green Energy Auction.
