VIGAN CITY – Manarimaan pay laeng iti imbestigasyon dagiti kameng ti Sta. Cruz municipal police station nga idaulwan ni Police Capt. Roger Baling-oay iti pammagkong a napasamak idi rabii ti August 14 idiay Bayugao Este, Sta. Cruz.
Nasayaaten iti kasasaad ti biktima a ni Ronel Tugade, agtawen ti dua pulo ket lima, baro ken agnaed idiay Poblacion Este, Sta. Cruz uray nu dua iti dunor a sinagrap na gapu iti panangbagkong kenkuana ti agama a da Carlos kenni Jefferson Rayray nga agnaed idiay Barangay Bayugao Este.
Segun ken ni Baling-oay iti pannaki-uman ti Bombo Radyo Vigan kenkuana, awan pay laeng iti makitkita da a posible a rason nu apay a binagkong dagiti agama ti biktima nga umin-inom ti arak iti pagtaengan ni Sandy Mendoza.
Ngem, atapen ti hepe a posible a gapu ti kina-ariwawa ti biktima ken dagiti kakadua na gapu ti panagvideoke da ti maysa kadagiti rason iti pammagkong, malaksid a nakainom pay dagiti suspek.
Saan met a naala dagiti otoridad ti patadem nga inaramat dagiti suspek ta posible nga intugot da met laeng idi naglibas da kalpasan iti pammagkong.
