VIGAN CITY – Nagpalagip ni Ilocos Sur Provincial Board Member ken Tourism Committee Chairman Gina Cordero kadagiti agplanplano nga umay bumisita ditoy probinsia a sumurotda kadagiti pagannurotan ita a malukatanen ti turismo tapno maibangon dagiti nalugi a negosyo gapu iti Covid19 pandemic.
Iti pannaki-uman ti Bombo Radyo Vigan ken ni Cordero, nakasaganan ti probinsia nga agawat kadagiti agsangpet a turista ngem kasapulan a kompleto dagiti requirements sakbayda a makastrek kas ti antigen test, travel pass ken masapul a nakapa-book da kadagiti travel agency.
Limapulo a turista laeng iti inaldaw ti mapalubosan a sumrek ditoy probinsia nga umay agpasiar ta paliiwenda pay no anianto ti resultana sakbay a mapagpapatanganto manen dagiti sumaruno nga addang tapno maliklikan ti panagraira ti Covid19.
Namnamaen ti opisial a babaen iti pananglukat ti turismo ti probinsia ket matulongan dagiti naawanan ti trabaho kas kadagiti kutsero, aglaklako kadagiti souvenir shop ken dagiti restaurant a nalugi.
