Agtultuloy ti panangikagumaan ti Ilocos Sur a manayonan ti anti-venom nga agas iti baet ti limitado a suplay.
Dayta ket kagiddan ti panangiwaragawag ti Ilocos Sur Provincial Hospital Gabriela Silang a libre nga ipaayda ti anti-venom kadagiti makagat ti uleg nga adda gitana.
Iti pannaki-uman ti Bombo Radyo Vigan ken ni Dr. Pocholo Baquiran, Chief ti nasao nga ospital, idi pay laeng napan a tawen ket addan ditoy probinsia ti nasao nga agas ngem limitado laeng iti sangapulo a vial ti suplay isu nga itultuloyda ti agkiddaw iti nayonna.
Kunana a maysa kadagiti parikut ti ababa a shelf life ti agas isu a narigat ti makarequest.
Bigbigen ni Baquiran a dakkel a banag ti kaadda ti anti-venom iti nasao nga ospital ta saanen a kasapulan a mapan iti sabali a probinsia tapno agkiddaw iti agas kadagiti makagat ti uleg.
Ti laeng Gabriela Provincial Hospital ti addaan iti anti-venom nga agas iti intero a probinsia.
